الأحد، 8 نوفمبر 2015

من أسئلتكم : هل الأمر يستحق كل هذا التعب؟

ورد إلينا هذا السؤال لأعضاء الجروب من إحدى الأمهات (من أهم مزايا الجروب هو الدعم المتبادل بين الأعضاء :) وبحمد الله توالت الإجابات كما ستقرأون )
س:
سؤال فلسفي بحت
بس محتاجة اناقشة مع نفسي و معاكم
احنا هنا بنحاول نعلم ولادنا تعليم مميز
وبما اني هوم اسكول مع ولادي من ٦سنين

حاسه اني محتاجه دعم نفسي علشان اكمل
احنا ليه بنتعب كل دا ؟؟؟
لية كم المجهود دا فالتعليم ؟؟؟
والمحصلة اية ؟؟؟
ابني من اوائل مدرستة ،، عادي يعني
وبعدين
باعلمهم كدا لية ؟؟؟
محتاجه اتناقش ،،
خلينا نعتبر المناقشة عصف ذهني
‫#‏محتاجة_دعم_نفسي

-------------------------------------------
ج1 : الهدف الأكبر والاهم اننا نربي اطفال (سعداء) كده كده هيذاكروا ويمتحنوا ويدرسوا .الفكرة اننا نقدر نوفرلهم طريقة تخليهم يعملوا كل ده وهمه سعداء ..ايا كانت الطريقه ومهما كانت مجهده او مكلفه

ج2 : "كلكم راع وكلكم مسؤول عن رعيته" , "ما من عبدٍ يسترعيه الله رعية، يموت يوم يموت، وهو غاش لرعيته إلا حرّم الله عليه الجنة"
يعني احنا كمسؤولين عن أطفالنا وعن مجتمعنا, لو كنا عارفين الأفضل والأحسن ومعملناهوش أو مبيناهوش عشان نوفر جهدنا وتعبنا يبقى احنا محملناش الأمانة, الأمانة إن الواحد يعمل الأصلح للي بيرعاهم مش السائد والمعتاد. كمان كل جهد بنعمله مع أطفالنا بيزود قوة العلاقة بيننا وبينهم وبيخلينا نفهمهم ويفهمونا أكثر وده أحسن من العزلة الأسرية والصمت البيتي اللي سائد في أغلب البيوت الآن. و لو أنا مصبرتش على ابني وتعبت معاه عشان أخرج أحسن ما عنده وأخليه يوصل لأحسن مستوى يقدر يوصله ... هل فيه مدرس هيعمل كده؟
ده غير السؤال بقى: أنا لو وفرت جهدي ووقتي, هاعمل بيهم ايه؟ تربية الأولاد عبادة لو فيه نية, والمال بيروح والله في الفاضي والمليان, وراحة ساعة بتشيل تعب يوم ... أما اللي مرتاح على طول ده هو اللي في آخر العمر بيتعب ويندم أو على الأقل مش بيستفيد بالوقت للآخرة , فلو هانتعب هانتعب , يبقى نتعب عشان أولادنا :)


ج3: احنا بالتعليم المنزلي بنربي عيالنا كبشر .... يشعر الواحد منهم بالعلاقة الاسرية اولاً يشعر بعلاقته مع العلوم والكتب والمعرفه ...يشعر باهمية اننا نشغل مخنا ....
نستخدم ايدينا في رسم خريطة او جهاز من اجهزه الجسم ... نستخدم لغتنا للتعبير والمناقشة ... نستخدم صوتنا للالقاء ...
تصبح عيوننا مفتوحة لترى وتشاهد وترصد ... وليست مفتوحة لشرود العقل في مكان اخر ...!!!
نتعلم منزلي حتى لا نفرح بجرس انتهاء الحصة ولكننا نفرح لاننا وجدنا جواب ما يدور باذهاننا من اسئلة ...
نتعلم حتى نعرف كيف نحرك سيارتنا بين الزحام بعقلنا لا باخراج يدنا من النافذة ورفع صوتنا بالصراخ هههههه
وبما انك علمت ابناءك ست سنوات منزلي .. لابد انك لاحظتي اختلافهم عن اقرانهم في التفكير وفي اللعب وفي التصرفات ... كل هذا سيفرق معهم حين يكبروا ويعملوا ... اصبري و استبشري خيراً فانت تزرعين نباتاً غاليا انت تزرعين انسااان


ج4 : رد مبدأي هو هدفي أصلا من الزواج والإنجاب. قول الله على لسان خليله ومن ذريتنا أمه مسلمه لك
تحسبيها يمين وشمال لن يعدل عمل صالح في حياتك ولا بعد وفاتك ان يكون من ذريتك " أمه " " مسلمه " لله عز وتعالى وتبارك سبحانه
التربيه المعقولة ممكن تخرج ابن مسلم التربيه المتعوب فيها ممكن تجيب ابن وحفيد مسلم
إنما ذريه هي أمه في إسلامها لله. دي تربيه فيها نيه وتوكل وإحسان وبذل وسعي ومجاهده ومكابده. اسأل الله ان يقوي ظهورنا ويلهمنا سبيل الرشاد

ج5 : امبارح كنت فى زيارة لاحد الامهات فى نطاق شغلى ابنها متخرج ومبيشتغلش بياكل ويشرب وينام او ياخد فلوس وينزل مع صحابه ويرجع اخر اليل
كان معايا زميل بيقولها معلش فترة وهتعدى قالتله هو انا كنت بعلمه واكبره علشان يقعد جنبى فى البيت لازم يساعد لازم يشتغل لازم يحس بالمسؤلية
الست لخصت حوار التعليم كله (حلو وحش غالى رخيص...مش فارقة )
فى النهاية احنا بنتعلم علشان نشتغل علشان نعيش


ج6 : هاتعرفى الفرق لما ولادك يكبرو ويبقو اصحاب مشاريع أيا كان نوعها تفيد الامة . لما ولادك باذن الله عندهم قدرة على حل المشكلات بشكل يفوق اقرانهم . لما بيوتهم تبقى مختلفة عن بيوت عادية عاشت وماتت من غير ما تعرف الغاية من وجودها . لما كل اللى حواليكي هموم ولادهم بتكبر مع كبر ولادهم وانتى حملهم بيخف من عليكي كلما كبرو . سؤال بييجى على بالى دايما . لو انا ماعملتش ده دلوقتى امال هاعمله امتى . وايه البديل . البديل برضه هايبقى فيه مجهود وتعب قلب . ادخلى على صفحات أولياء امور أى مدرسة فى اى مرحلة .مشاكلهم لا تقل عن مشاكلك بل تزيد . طب خلاص بفى طالما تعب بتعب يبقى اتعب على حاجة تستاهل . وكفاك أن ترى الله من نفسك خيرا

ج7 : الجهد ده علشان احاول ان ابنى يبقى له بصمه فى الحياه يقدر يؤدى الهدف اللى ربنا خلقنا علشانه عباده وتعمير لاننا للاسف ﻻ نعبد الله حق عبادته وﻻنؤدى دور التعمير بطريقه صحيحه وﻻزم ده يبقى هدف ﻻوﻻدنا مش يكون هدفهم شهادات وسمعه واسم يكون هدفهم بصمه
ولو قدرنا نحقق ده مع وﻻدنا يبقى احنا كمان وضعنا بصمه وعملنا حاجه كويسه نقابل بها ربنا عوضا عن فشلنا الشخصى وطبعا اذا خلصت النيه فاعمال ابناءنا فى ميزانا ايضا


ج9 : مفيش اجمل من انك تشوفى ابنك احسن منك وتشوفى ثمرة جهدك قدامك وتحسي انك عملتى ليه افضل شئ متوفر لكى
كمان زمانهم مختلف عننا
وسيدنا على قال ﻻتربوا اوﻻدكم كما تربيتم فهم خلقوا لزمان غير زمانكم
وهم زمانهم محتاج ناس شخصيتها قوية فاهم تاخد قرار ازاى
زمن صعب كله فتن مااطمنش على بنتى او ابنى ان حد تانى يزرع فيه قيم ممكن تكون غلط
سيبك من الدرجات والمراكز لو على كدة فيه ناس معاها حرف ومهارات يدوية والله عايشين ملوك عننا ومستوى مادى ممتاز
المهم الدماغ الفكر

هناك 4 تعليقات:

  1. أنا عاوزة اتواصل مع اللي نفذوا بالفعل فكرة التعليم المنزلي في مصر اوصلهم ازاي

    ردحذف
  2. أنا عاوزة اتواصل مع اللي نفذوا بالفعل فكرة التعليم المنزلي في مصر اوصلهم ازاي

    ردحذف
  3. عاوز افهم هل التعليم المنزلي مبيتسجلش في مدرسة ؟
    بتعملوا ايه في الامر ده ؟

    ردحذف
  4. عاوز افهم هل التعليم المنزلي مبيتسجلش في مدرسة ؟
    بتعملوا ايه في الامر ده ؟

    ردحذف