من أسئلتكم: كيف أتغلب على الصعوبة والضغط في بداية التعليم المنزلي؟

السلام عليكم عندي ثلاث أطفال تقريبا بنفس العمر وقررت ووالدهم تعليمهم منزليا ولكن المشكلة في إني بقيت عصبية جدا بتنرفز على اتفه حاجة يعملوها وعلى طول حاسة اني مضغوطة ومتضايقة رغم ان ممكن يعدي علينا ايام منعملش فيها اي حاجة تخص التعليم انا بقيت حاسة اني تايهة وأُفسد من حيث اردت الإصلاح هل من مساعدة؟

وعليكم السلام ورحمة الله وبركاته
أعتقد إن مشكلتك هي إن اللي عايزة تعمليه معاهم أكبر من قدرتك وقدرتهم, وبالتالي بيحصل إحباط وإحساس بالضغط فتتوقفوا عن العمل ويزيد الإحباط وهكذا في دورة مستمرة
أولا لازم تقفوا شوية انتي وزوجك تراجعوا أهدافكم: انتم ليه بتعلموا منزلي, وبتطمحوا لأيه معاهم

بعد كده اكتبوا خطة واضحة ومفصلة لمدة أسبوع واحد فقط: ايه اللي بنهدف ليه مع الولاد, وهنحققه ازاي , اكتبوا بالتفصيل قدر الإمكان وحطوا من ضمن الخطة كل حاجة, الأنشطة الداخلية والخارجة, لو هيروحا مثلا المسجد عشان القرآن برضه تتكتب في الجدول ..الزيارات المخططة .. الخ
بعد ما تكتبوا الخطة وتقسموا الأنشطة على أيام الأسبوع, راجعوها وحاولوا تفكروا : هل حطينا زيادة ؟ هل ده أكبر من طاقتنا؟ راجعوا الخطة وحجمها كويس
بعد كده سجلوا الوقت اللي أخدتوه في التخطيط (ولنقل مثلا ساعة أو ساعتين ... ) عشان مهم للمستقبل
خلال الأسبوع كل يوم الصبح راجعي مع زوجك وانتوا بتفطروا ايه خطة النهاردة, هتعملوا ايه وهل فيه أي حاجة ناقصة في متطلبات النشاط ... الخ الموضوع خلال ربع ساعة يكون اتمشى على الخطة
آخر اليوم علمي في الخطة على الحاجات اللي عملتيها, اللي ما اتعملش اكتبي جنبه ليه ماتعملش وهل ممكن يتعمل بكره بدل النهارده؟ لو حسيتي فيه وقت فائض كبير اكتبي, لو حسيتي اليوم كان زحمة اكتبي (خللي بالك مهم للأطفال يكون فيه وقت حر للعب, فمتزحموش اليوم أوي) الكلام ده مش المفروض ياخد أكتر من ربع ساعة برضه
في نهاية الأسبوع ادوا لنفسكم درجة من عشرين : حققنا أد ايه من الخطة؟ ايه المشاكل؟ ليه في حاجات ما اتعملتش؟ ايه الحاجات الكويسة وايه الحاجات الوحشة ... الخ وسجلوا وقت التقييم ده برضه
حطوا الورقة بتاعت الخطة بملاحظاتها في دوسيه عشان هنحتاجه أدام
ابدأوا خططوا للاسبوع اللي بعده (ممكن تاخدوا يوم حر بين الخطة دي واللي بعدها) أسبوع واحد, الأنشطة فيه محددة, بتكمل على الأسبوع اللي قبله ... سجلوا الخطة بالتفصيل, واكتبوا وقت التخطيط
كرروا الموضوع ده لمدة 4 أسابيع, لو فيه مشكلة ارجعولنا في جروب التعليم المرن هانناقش معاكم الخطة ونفكر سويا فين المشكلة
لو قدرتم تنفذوا بنجاح لمدة 4 خطط ابدأوا خططوا لمدة 10 أيام أو أسبوعين ... وهكذا
مهم تشوفوا التقييم مع الوقت بيتحسن ولا لأ
الطبيعي وقت التخطيط يقل مع الوقت لو بيزيد يبقى فيه مشكلة
اقرأوا اللي بيعلموا منزليا بيخططوا ازاي واسألوا على الجروب في أي حاجة مترددين فيها, الأعضاء ماشاء الله نشطين وبيساهموا دايما

وأخيرا نرشح لكم بشده هذا الفيديو عن التخطيط في التعليم المنزلي حيث يستعرض طرقا مختلفة للتخطيط عند تطبيق التعليم المنزلي


https://www.youtube.com/watch?v=qYV_d4SbuUs